Mézami, mon bande dalon, si mi di azot mwin lété domi_kontan kan biden lo nouvo prézidan lété élu é lo l’anssien donald Trump batu, zot va dr amwin-é sirman lé vré- i fo kant mèm pa kroire Père noël pars pou sak i oi in pé pli klèr ké mwin dann la politik amérikène : Trump-Biden, Biden-trump sé parèye parèye..
Zot va dir amwin galman Trump sé sak la prèss té i amontr anou, Biden sé sak i amontr anou koméla .Mé i amontr pa nou ditou lo konplèks militaro-indistriyèl alé oir sa banna ki fé ké lo prézidan épi lo kongré i désside. Donk lo déssidèr ki désside pou vréman sé so konplèks-la, édé par la C I A .
Zot va dir amwin lété pa itil aspère bande gran shanjman dann la politik amérikène vi ké la shanj prézidan . Lé vré l’amérik la fé dèssèrtènn shoz mwin la apréssyé konm lo rotour dann lo zakor d’Paris, konm in rolashman dann lo boykott Kuba- in rolashman in pé bokou timide vu ké Kuba la débrouye kaziman son toussèl pou lite kont lo Covid.
Aprésa lo prézidan i kontinyé fé soufèr lo pèp Vénézuéla.Li la vande l’afghanistan klé an min bande taliban-i fo dir Trump té fine déside avan.San obliye la ménass l’amérik i fé pèze dossi la chine, mé la li zoué avèk dofé é la guèr si néna la guèr èl sar pa froide ditou é bien sho.A ! zot va di la guère sar ékonomik ! antansion pars i pé komanss ékonomik pou alé dann d’ote diréksyon.
Ni pé dire galman li la poin in mo pou lo pèp shagossien i soufèr dann légzil é la déportassyon alé oir li ménass pa pèrsone é li vé solman rotourn viv dann son péi natal.. Alor mézami,mi kroi pa son promèss anlèr é sanm pou mwin Biden-trump, trump-biden topète morète boi d’zalimète ;blan boné épi boné blan.
Nb Mèm avèk son zalyé l’amérik i mète pa lo gan-agarde l’afère bande sou-marin-alor parl pi avèk sak li panss sé son zènmi.