Nana d’moun i mète zoli-zoli linz. Nana d’moun i mète linz izazé. Na pi d’koulèr konm i di. Nana d’moun i mète pantalon rapyésté. Dizon la pa par sa, ou lé émé, sansa ou lé pa émé. Si ou i abiy an dantèl, ou i fé l’éfé an débitan épizapré l’éfé i pass, i disparète, i évapor. Kozman moin la di an-o la sa in kozman bann z’antiyé é pou konprann ali la pa bézoin kass tro l’ koko. Mé ni pé poz anou in n’ot késtyon : dsi tout demoun i fé tout z’ot parkour ansanm, sansa in bout z’ot parkour, nan konbienn moun i yèm pou vréman ? Si l’avé in majorité noré pa divors pou in oui, pou in non. Na poin lontan moin la antann in madam katrovin é kèk apré di avèk son mari, ou sé pa l’om dé ma vi pars ou la maryé avèk moin pars moin l’avé shèk kom out famiy la di… Alé ! Mi invite azot réfléshi la dsi é ni artrouv pli d’van sipétadyé.