Mézami, mi panss konm mwin zot lé in bon pé pou rofléshi dossi l’amour, in santiman éssanssyèl rantre nou pou dévlope lo réspé, la zistiss, épi l’armoni, pou l’antante, l’antrède galman épi la solidarité. Défoi nou néna l’inpréssion sa sé in sours i sèk ar pa zamé : opliss wi ansèrv, opliss ou néna. Ni panss mèm lé possib ansèrv de li an gaspiye olèrk lé zot rishèss ni ansèrv an prékossion.

Antouléka, afors oir toussa d’moune i donn zot l’amour pou lé zot san konté mi roflési dsi é mi rapèl mon momon-konm in bonpé l’amontrèr lontan- téi ansèrv son vakanss, son soiré, mèm son dimansh pou fé travaye marmaye épi ède azot pass zot sèrtifika, èl mèm malade épi fatgué avèk la maladi. Mi rapèl mon papa téi koz rante son dan épi mi panss konète kossa li téi di.

Mwin lé sir li téi di sak mwin la marke an-o la... Pétète pa la mèm fasson mé sirman apopré la mèm shoz.

Alé ! Mi kite azot rofléshi la dsi é ni rotrouv pli d’van, sipétadyé