Oté

« L’amour lé konm in plant grinpant, si li la poin arien pou amayé li sèk an plas »

In kozman pou la rout

Justin / 6 out 2019

JPEG - 43.6 ko

Médam, mésyé, la sosyété, mi pé dir azot in n’afèr ? Pou mon par moin lété in pé tris kan sa l’arivé : figir azot moin l’avé plant dé-troi boutir la vaniy é moin téi di dann mon kèr, san tardé, mi sava gingn plizyèr gous vaniy. In pé moin l’avé fé mont dsi griyaz, in pé dsi lo fèr torsadé … Inkroiyab mé vré, olèrk bien pousé-pars moin téi done ali dolo, moin téi done ali fimyé é mi pans li téi gingn solètye an sifizans - mon dé-troi boutir la komans séké, arséké, konmsi zot téi trouv pa zot kontan l’androi moin l’avé plant azot. Konm in mové voizinaz ! Moin la dmann inndé dalon kosa l’arivé : inn la di amoin sirman fourmi la manj son l’ékors, in n’ot la di amoin sé pars lo bann ti lien la kasé. Pou finir néna inn la di amoin la vaniy i pous pa dsi bann titèr lé pi vivan. Alor moin la pans pétète lo dèrnyé la rézon, pétète pa-tout fason la natir koméla lé tazantan in pé bizar.. Mé oila lo tan la pasé épi ala k’in zour mon bann boutir la arkomans pousé : dousman, ti dousman, zot la fé bann ti kèr, épi lo bann ti lien zot osi zot la mète a amaye bann fil do fèr é moin la pans pétète l’ané ki vien m’a gingn inn-dé gouss la vaniy bourbon : akoz pa ? An touléka ziska zordi moin la pankor konprann dsu kèl prinsip lo bann boutir la bazé. Alé ! Mi kite azot rofléshi la dsi. Mi souète pa zot oir z’ot lamour séké, ni zot boutir vaniye dékaniyé é ni artrouv pli d’van. Sipétadyé !