Matante zélida la ékrir Justin :
Mon shèr nové, mon spèss salté, rouj-de-fon dovan l’étèrnité, si mi arvien dsi bann rouz épi zot parti kominis zordi, sé pars koméla zot i vé fé kroir lo mond zot la touzour pran parti pou la Rényon départman fransé, alé oir kan zot la domand lotonomi, par l’fète zot téi tourn lo do avèk la loi Rénion départman fransé, é zot la lèss Michel Debré pran la tète bann partizan La Rényon départman fransé - konm i di l’avé in guèr rant bann séparatist é bann nasyono é sé bann nasyono la gagné é l’ané 1981 bann séparatist la rann lé zarm. Tok ! Pran sa pou zot !

Justin la fé pou répons :
Mon vyé matante k’i koz arienk la boush rouvèr ou néna vréman out fasson po prézante lé shoz, mé malorozman la pa la vérité :
Néna in n’afèr, mi koné, i fo mi di : in zour mwin té apré diskite avèk Bruny Payet-in gran kamarade la fine pass l’ot koté - é li la di amwin kékshoz konmsa : kan la fé parti kominis l’ané 1959, band résponsanb la konstate plizyèr zafèr -

- inn bann gouvèrnman gosh konm droite téi trènn la zanm pou aplik bann mézir pou lo progré sosyal, lé shoz téi avans pa é lo pèp téi soufèr vréman la mizèr.
- la démokrasi té an pane avèk la frode éléktoral roganizé d’an-o par l’éta é son bann konpliss issi la Rényon. Mars l’ané 1959 nèrvis la tir dsi d’moun ste clotide épi la matrak Paul Vergès dovan la méri é la lèss ali pour mor.
- la kiltir rényonèz lété pa rokoni ditou ;
- épi in lanaliz sèryé téi amontr si té i kontinyé konm sa lété inpossib dévlop lo péi. Sa lété si tèlman vré ké zordi ankor lo péi i koné pa in vré dév lopman. Lo konklizyon : téi fo lotonomi pou la rényon é sirtou pa kontinyé in marsh an kass-in-ki konm nou lété angajé d’dan. Tok ! Pran sa pou ou !