Dopi inn-dé zour mi antann désèrtin moun apré jakasé dann désèrtin radyo par raport la shalèr épi lo dékalaz bann zégzamin. Lé sur kan i fé konmsa isi La Rényon nou lé pa loin baskil dann l’absurd. In l’absurd in ga konm Virapoullé la touzour défann dopi lo komansman ziska mi éspèr la fin son karyèr politik k’i tard pa arivé.
Moin la vi kékpar in pé apré ékri si in n’afèr konmsa i ariv shé nou sé par l’amannman Virapoullé. D’ot i ékri mèm avèk l’amanman Virapoullé lété posib pa dékal la date brové. In pé i di mèm akoz pa anvoye bann jenn La Rényon pou pass z’ot brové laba dann La frans. Par l’fète, pé sfèr dann bann ministèr i koné pa bien ousa La Rényon i lé, é bann koko fromaz i travaye dann ministère, pétète , l’avé pèr fé in boulètt. An touléka, sanm pou moin, banna la agrandi lo karo la kouyonis l’apré fatig azot épi nou par lo mèm okazyon.

Astèr bann zokazyon konmsa i mank ar pa dann lo fitir. Pou koué ? Pars réshofman klimatk i atann pa nou. Pli pir li aksélèr ané dsi ané, é si i kontinyé konmsa ébin zot i oi ousa i sava amenn anou.. In sèl zafèr lé domaz : avèk zot souplèss an vèr d’lanp bann l’administrasyon fransèz lé pa paré pou in l’adaptsyon. .. Konm dann l’Almagn ! Pou kosa ? Pars laba, kan i fé tro sho bann marmaye i sava an vakans é vakans-la i apèl : Ferien-Hitze donk vakans de shalèr.
Mi souètré in sèl zafèr sé kan v’ariv moi d’novanm, désanm, é pi févriyé épi mars, kan bann ti marmaye La Rényon sar apré soufèr avèk la shalèr, bann paran épi bann sindikalis i sava dann bann klass épi bann kour la rékré, konm dan la kantine pou note lo tanpératir é kan va sote 35 dogré dann l’onbraz déklansh bann z’aksyon asé for pou k’an o lyé i tienbo kont…

Pou anpèsh l’ékol ? Non va, mé sinploman pou k’i fé in l’ané éskolèr klimatik : sa lé rézonab ! Par l’fète la poin pli rézonab ké sa !