Matante Zélida la ékrir justin :

Mon shèr nové, mon spès salté, rouj-de-fon dovan l’éternité,
Mi sipoz vi doi z’ète kontan oir bann marmay lékol apré manifèsté pars i fé tro sho dann la klass. Konmsi sa lété in rézon valab ! I fé sho dakor, mé sa in rézon pou grévé sa. I fé sho, dakor, mé La rényon sé in péi ousa k’i fé sho. Alors ousa i lé lo problèm si na in problèm ? A oui, mi konpran bann rouj ! Zot i pans l’èr l’zarivé pou arparl l’ané klimatik. Final de kont pou sèy tash moiyin sépar anou ankor in pé avèk La Frans, pars sanm pou ou kan i modifyé lo kalandriyé éskolèr sé pou raprosh nout l’ané éskolèr avèk sète lo légzagone. Ou i rann pa ou kont, lo réktèr i vé lo bien bann marmay lékol i sava fé zot zétid dan La Frans é tanpir si i fo siport in pé la shalèr. Tout fason si i vé klimatiz bann sal do klas, nana moiyin zordi avèk tout kalité téknik nou nana. Alor si namoiyin moiyéné i fo moiyéné ! tok, pran sa pou toi !

Justin la fé pou répons :

Mon vyé matant k’i koz touzour la boush rouvèr,
mi antan bien ou i pans la shalèr dan lékol. Pou ou, sa sé pa in problèm. Romark bien sé pa in problèm non pli pou bann kol blan i travay dann biro klimatizé. Pou zot, zot i kal zot klim dsi dizuit sansa vin dégré épi fé roulé Férèr ! Tout fason, pou zot kisa sé lé shèf ? Bann marmay lékol... A bin non ! Bann paran z’élèv ? A bin non, pars zot i doizète rokonésan pou sak lo gouvèrnman i fé pou zot... sé lo minimom. Bann zélu ? A bin non ! Zot i doi kontant azot trouv lo moiyin pou lé jans bien travayé… L’éshofman klimatik ? Sa i pass dsi nou, i flout dsi nou, konm lo dsi fèy sonz. Dé dégré an plis ? Kat dégré anplis ? Kréol na la plim kanar..

Mé na poin arienk la shalèr, i pans pa mové tan don ? An plin dann tan siklone i anvoy marmay lékol. Kan i diminyé lo pèryod vakans tan sho, i goumant lo risk laksidan. In rantré lo 14 janvyé sé plis lo risk pou bann marmay. Forsé ! Siklone, l’inondasion, tornad, lo van, loraz, ra d’maré...tousala, ni vé, ni vé pa sé dé risk.

Astèr toudinkou de moun i réaliz nou lé dann lémisfèr sid é i pans l’ané klimatik lé pa in si mové z’afèr ké sa vi ké i fé lékol sirtou kan i fé moin sho, kan na moins l’oraj, kan lo van lé pli fèb, kan la rout lé moin kassé, kan na moins gro plui... Sré mèm in bon z’afèr ! Konm di l’kont : "Lé posib fé bann fo konsiltasyon ! Mé, ni vé, ni vé pa, la réalité nana tèt dir ! La réalité lé téti. Tok ! Pran sa pou ou !

 Justin 

NB Kékshoz an pasan : dann désèrtin péi dann l’Almagn kan i fé tro sho, bann marmay i gingn "Ferien Hitze"- vakans la shalèr ! Mi di pa fé parèy, mé konm i paré l’Almagn sé in modèl i pé touzour pous la kouyonis pli loin.