A ! Zourdlan, sa nou té i yèm kan nou lété marmay, myé k’noèl, myé k’pak... zourdlan-la, sa lété in zour valab. Zour-la, nou té i souète la bone ané sé pa konbyin d’moun, oute famiy dépi in n’an ou la pa vi. Bone ané gro-mèr, bone ané gro-pèr, bone ané marène, bone ané parin insi d’suite... i diré nora pa arète zamé. Lé vré la famiy té long dann tan-la !
Koman-koman, nou marmay, nou té i gingn in pti zafèr dan la zourné, kansréti in siflète, in pti tronpète... défoi mèm, in pti kordéon a boush. Monstré, nou té i ral-ral in pé déssi épi té i finir par tir in l’èr. Koman-koman, dan la zourné té i trouv in n’afèr pou kontante la boush, an déor d’manzé byin antandi : in boute bonbon koko, in boute kolodan pistash... A ! In morso paté kréol ! La pa konm sak i vann koméla, mé konm sak matante Sisya té i koné si byin fèr. La likèr, té pa pou nou ! Sof kan nou té i ramas lo vèr… In kou d’doi dann fon é té i gingn goute in pti gui-guine lo boisson sikré. Nout boisson té in pé limonade, sitron, sansa grénadine. A ! sa té vayan pou vréman ! Arzoute èk sa in pti paké pétar, nou téi fé pète a lékonomi, inn-par inn... sa téi fé "Pafr !"... Marmay téi kri :"Viv Zourdlan !". Mé la zourné i fini… solèy i lav son pyé ! L’èr pou alé l’arivé... shakinn i sava son shé-soi. Alé ! N’artrouvé l’ané proshène. Anfin, n’artrouvé si plé-t’a-dyé !

Justin