Matante Zélida la ékrir Justin :

Mon shèr nové, mon spèss salté, rouj-de-fon dovan l’étèrnité alor a s’ki paré gouvèrnman i sava pran la sharj fini la NRL pou nou avèk in bon pti lardoize 420 milyon l’euro… é zot ki dizé La Rényon nora débrouye aèl toussèl pou sa. Alor l’avé pa di téi gingn pa konte dossi la solidarité nassyonal. Konm dabitide kozé lé bon, mé fère lé méyèr. Konm dabitide zot ane sé t’inn bourik. Tok ! Pran sa pou toi !

Justin la fé pou réponss :

Mon vyé matante k’i koze toultan la boush rouvèr, dabor i fo mi di aou la route si l’avé ékoute Paul Vergès sa noré pa trène konmsa é anpliss nou noré gingn lo tram-train avèk. Alor la pa bézoinn wi shante amwin lo mérite la droite pars son mérité sé sa :

Rotarde la route dé tan é dé tan, pa fé lo train avan la sin-glinglin. Wi parl d’in ésploi !

Anpliss ké sa, gouvernman i pran la sharj l’ashèvman la route pou sinkante pour san é lo rest sar a noute sharj. Toussa pars la droite l’avé in gran négossyatère i apèl Didier la mète anou dann in trin pa possib. Lo l’ane sé inn bourike é lo bourike pa bézoin di, mi koné sé ki.

Tok ! Pran sa pou ou !