Zordi, dann La Frans la-ba i antèr Jacques Chirac ansien prézidan é d’apré sak moin la konète, d’apré sak moin la antann épi sak moin la lir si i désid fé in bilan l’aksyon prézidan-la, i pé dir l’avé lo bon, lo moin bon épi lo mové. La pa dann mon manyèr réspèkt lo prinsip ipokrite nout sosyété kan è i transform an bon moun tout bann moun la fine pass l’ot koté la vi, kan zot i pass l’ot koté la vi. Donk la pa dann mon zidé anparl solman lo bon épi mète dé koté sak lété mové.

Konm provèrb fransé i di : l’avé, dann son program, pou boir é pou manzé, in mélanz la vièye Frans radikal avèk la vièye Frans réaksyonèr. Donk forséman néna dé shoz li la fé i pé fé plézir, é d’ot sizé k’i fash : i fo pa pass sou silans kan la tyé d’moun laba dann la grote Ouvéa dann péi Kanaki. Mi antan ankor kan li la di an parlann Paul Vergès, néna zadvèrsèr épi néna zènmi é li la klass nout kamarad épi nout parti dann klan son zènmi é sanm pou moin dann la boush in om d’éta avèk lo pou voir li néna i fo pa pran sa konm in plézantri…

Mi souvien ankor kan li té i parl bann zémigré avèk sépa konbien fanm épi sépa konbien zanfan avèk lo brui épi l’odèr.I pé pa non pli mète sa dann ran profizé pèrt lo sinkant dé kou d’éta-pa tout dann tan chirac té prézidan - épi lo bann prézidan tyé dann bann péi l’afrik é ziska péi komor… pou in bann rézon moin la fine gingn lokazyon ékri.

La pankor fini