Médam zé méssyé, la sossyété, koz èk mwin sé koz èk in kouyon, mé sé o pyé d’lo mir k’i oi lo masson.

Mézami sirman zot i koné kossa i lé in gamate : sé ladan ké lo masson i mète mortyé pou li fé in pti travaye mé sé ladan galman ké li ramass lo rèss mortyé an tro dsi lo mir. Donk si néna in bonpé rèst dann gamate, sa i vé dir ké lo masson i gingn pa bien travaye a lékonomi,mé a léfikassité galman, épi a l’adress.

L’aplonb sé in n’ote afèr : sak lé perpandikilèr, sak lé droite va di li lé d’aplonb é opliss lo masson lé bon opliss l’aplonb lé réspèkté. In masson abil i sava pa fé in mir gosh-gosh, in masson adroite konm zozèf a gosh sar pa lo mèm ka.

Astèr d’apré zot sé in kozman k’i pé aplike dann d’ote sityassyon ? Mwin pèrsonèl mi panss ké oui, é mi raprosh ali avèk lo kozman mwin la marke an-o la é k’i di konmsa sé o pyé d’lo mir k’i oi lo masson. Sé konm in l’invitassion pou ziz in moune d’apré lo rézilta d’sak li fé é pa d’apré la tète lo kliyan.

Alé ! Mi kite azot rofléshi la dsi é ni rotrouv pli d’van, sipétadyé.