Matant Zélida la ékrir Justin :

Mon shèr nové, mon spès salté, rouj-de-fon dovan l’éternité, mi pans konm moin vi suiv l’aktyalité é vi oi tou lé zour, zour pou zour néna bann migran i ariv dann l’érop. I di zot i sov la mizèr, la vyolans nana dann z’ot péi épi zot i rode in bon l’androi pou viv. Pou moin pèrsonèl mi pans shakinn i rès shé soi é shakinn i ésèy ansort ali. Moin la lir dsi l’ordinatèr, in kozman in gran shantèr La Rényon Jacky Lechat té i di : pou li, si lé pa bon shé ou pran lé z’arm pou règ out problèm. Mèm si lo boug lé dann fron nasyonal zordi, moin lé kant mèm dakor avèk li. Moin lé sir ou i sava dir amoin sé la fote bann péi l’erop. Moin mi kroi pa sa inn-tyork sé lo bann dirijan lo bann péi ké lé résponsab, pou anshévé kan la rolijyon i mèl dodan, lé pli pir ankor. Tok ! Pran sa pou ou !

Justin la fé pou répons :

Mon vyé matant k’i koz touzour la boush rouvèr, bien antandi moin lé pa dakor avèk ou. Pou kosa ? Pars ou i fé konm l’informasyon ofisyèl, ou i fé konmsi tousa l’ariv konmsa, par azar. La pa la fote pèrsone é sirtou pa la fote bann éropéin ; la pa la fote bann fransé, bann z’anglé é bann z’amérikin ! Dann désèrtin ka lé fasil konète kisa lé résponsab : La Libye l’avé pou shèf in mésyé Khadafi. Toultan ké li lété vivan, shakinn té i viv shé soi, mé kisa la port la gèr dann son péi é kisa la tyé ali. Dopi ? Ni koné sak i éspas. Dann l’Irak l’avé in diktatèr, mé toultan ké li té la, shakinn té i viv shé soi é zordi ké la tyé ali é la ranvèrs son pouvoir, ni oi sak i éspas. Zordi i désid ranvèrs lo shèf La syrie, i ède bann révolté é kosa i éspas ? Ni koné. Alors, si l’érop la pa résponsab san pour san dé sak i éspas ni pé dir désèrtin péi i port in gran résponsabilité (pou kontant z’ot bann kapitalis !) é zordi sa i rotonm dsi zot, dsi nou mi vé dir, dsi toulmoun. Si ou i krash anlèr, i artonm dsi out bout lo né ! Tok ! Pran sa pou ou !