Gramoun i di “Si la pa zordi, domin, i trouv touzour“ minm si i tonm pa dan nout lantouraz prosh koté nou la minm, minm si mandoné i fo désot la mèr, èk tout rézo néna, ni ariv touzour a konèt, a an awar dé nouvèl frèsh, sirtou kan dé-fwa néna i mèt larné d’si do koshon. Ala ni vyin aprann ankor, mé nou té i koné déza, pou désertin larzan i grinn konm kaka kabri. Konm di nout maloyèz “sat lé oki, lé oki pou d’bon, sat néna, néna pou gaté“.

Ala banna la soulèv in gro lièv pou d’bon, boudikont lo larzan pou gaté, i prétan i dor dann in paradi fiskal é lo bann propriétèr lo larzan, pou désertin i viv an parmi dann in lanfèr shomaz, mé sa lé pa tro zénan pou zot. Dann télé in boug la donn in lidé domoun lé évadé fiskal. Néna lé ésportif, néna shèf lantropriz, néna miniss, i préta dir néna minm shèf léta, alé konprann ou ?

Pou la franss, an gro i di, pou lèr, la souk apopré 1000 moun san konèt pou konbyin larzan néna, mé, vi lo déliz, sanm pou mwin néna pou zoué d’dan. Mazinn in pé si i rovidré so larzan dann lo sirkui travay. Lo sistinm paradi fiskal an li minm, lé pa intérdi i di, mé kondisyon lo moun i déklar son zinpo d’si sak i raport a li. Lé tan i pran in pé larzan ousèk néna, sirtou kan ni koné “Larzan séré i fé pa ti“ !