« L’arzan volé i san pa transpirasyon ! »

Ni koné nana l’arzan gagné, konm k’i di, a la syèr d’son fron donk l’arzan gagné onètman. Aprésa nana l’arzan volé. L’arzan volé, sa nana in bonpé i sirkil kisoi par bann pti volèr, kisoi par bann gran volèr kisoi ankor bann zéskrok, sak I fé parti la délinkans an kol blan. Tout fason, sa la pa l’arzan mérité vi ké sak la gingn ali, la pa transpiré pou sa. Astèr, in pé i di : « volèr i prospèr pa ! ». Lé vré in bonpé pti volèr i fini z’ot karyèr déyèr baro, mé in pé volèr i fini rish konm Krézis. La pa pou sa k’i fo bate la min pou zot. Si zot la pass par maye sé inn shans pou zot, inn shans mé pa in shans mérité. Fransh vérité, l’arzan volé i san pa transpirasyon. Ala sak mi pans, mé pétète zot i pans pa konm moin ; domaz pou zot pars sé moin k’i frap dsi lo klavyé. Alé ! Ni rotrouv pli d’van.