Pou sak la pa konète pou vréman sak Perreau Pradier, in l’ansien préfé La Rényon té i aèl « la shèr é dous frans », mi sava rakont azot in zistoir moin la antann so matin dann radyo. Mi koné pa lo moun téi rakont zistoir la, mé mi dout pa sak li la di lété vré toul bon pars moin la antann tan é tan d’zistoir konm sa l’ariv isi dann nout péi. Ala lo zistoir moin la antann dsi radyo fridome lindi matin :

Lo moun i prézant ali konm in marmaye tèt dir. Si tèlman dir k’in zour son papa étan mor, son momon la désid donn al i la popilasyon. Lo marmaye la antann nouvèl la, pars fitintan bann grann pèrsone té i pans bann zanfan lété bète vèye pa koman é zot té i konpran pa gran shoz. Donk li la aprann l’asistant sosyal té i doi vnir pou prann ali. Promyé désizyon : li désid alé maron dann l’arondisman é kan l’asistant l’arivé, li té fine kite la kaz pou alé dann bitasyon lé z’alantour.

Donk lo promyé kou d’filé la manké.

Solman li té i koné dann in ka konmsa, lo dézyèm kou, épi lo troizyèm épi l’ot ankor sé bann zandarm té i vien pou kapaye bann marmaye... Donk in gran matin li antann zip zandarm i rant dan l’alé, li sote par la fénète épi loumaye. Zour d’apré parèy é zour d’apré parèye ankor. Li sov dann karo maniok bann voizin, li rash maniok pou manzé ép li grinp dann pyé d’boi.

Zandarm i arète in kou pou vni shèrch ali son kaz mé dann in ka konmsa li koné zot i vien l’ékol. Dann l’ékol, li rakont in zorèye sé pou ékout lo mètr, in zorèy sé pou ékout zip zandarm, in zyé pou rogard tablo épi in zyé sé pou suiv lo z’alan é lo pasan dann l’alé l’ékol. Kan zandarm i ariv, li sote par la fénète épi arvoir Pyèr tak baro.

Sa la dir in bon koup de tan épi in zour zandarm la pi vni é li l’artrouv in grin la trankilité. Li la bien antann d’ot marmaye konm li bann zandarm la kapayé, kisoi pou mète azot l’APECA, kisoi pou anvoye azot Salazie dann in trik i apèl Lapèp, kisoi ankor pou anvoye azot dan La Frans konm zanfan La Krèz.

Lo moun nana zordi soisant z’ané pasé é promyé foi li oz rakont sa dann radyo pars sanm pou li zordi solman li pans li na pi arien pou an avoir la krintiv é solon li ,li lété sirman pandan lontan in marmaye pa rokomandab.

Konm zot i oi l’avé d’gou lontan viv dann la shèr é dous frans dann réjime Perreau Padier. L’avé d’gou pou vréman !*