Somenn pasé moin la vi dann Témoignaz désèrtin kamarad kominis la fé in pti sérémoni d’souvnir dsi in ga té i apèl Edouard Savigny lété tyé par bann nèrv is Sintandré é moin pèrsonèl mi aprésyé bann kamarad kominis i fé in sérémoni d’souvnir pou bann kamarad la gingn lo kou, la gingn la mor avèk bann nèrvis la komine, é sirtou mi aprésyé bien lo kapasité bann kamarad pou rézisté... Mi sava pa rapèl azot listoir Edouard Savigny pars nout zoinal somenn pasé la anparlé épi not kamarad Eugène Rousse, zordi désédé, li osi la fé listoir bann viktime la réprésyon.

Mi koné pa ozis kisa la dévlop in éstratézi konmsa dann tan ma zénèss mé sak moin lé sir sé ké lo bann mèr épi zot nèrvi téi gingn ransègnman épi zinstriksyon avèk bann sèrvis éspésyalizé la proféktir. Kan mi rapèl sak la spass i pé partou dann in pé tout komine, mi pans pa sa l’ariv tousèl éspontanéman, mé ké bann mouvmanl lété roganizé : l’avé nèrvis, l’avé CRS, l’avé la polis é tousala téi fé inn mèm sa é zot téi gingn lé zord avèk lé mèm moun. Po moin sa téi apèl la roganizasyon la réprésyon avèk lo mèm loprésèr, avèk lo mèm viktime in tan lé pa si loin par raport a nou.

La réprésyon mé zami , èl lété globalizé : El lété ékonomik. El lété rolizyèz : bann kominis souvan défoi bann gran krétien lété privé d’sakroman. El lété administrativ : téi rèye out nom dsi la list zéléksyon. El lété psikolozik : téi mète aou sansa out madam épi out zanfan dann l’infèryorité. El l’avé ankor in bon pé fasète sak i fé èl lété global é tout bann moiyin la réprésyon té asosyé pou fé mète aou in zonou a atèr… Mi rapèl in n’afèr, listoir in vyèy pèsone té i vien nout kaz, shak zour kan zéléksyon i ariv - in vyé famiy si zot i vé. Momon téi fé done ali dozèf bouyi avèk in pti kou d’sèk é pou finir mon papa téi done ali in biltin Vergès. Aprésa li téi sava son kaz ziska biro lo landmin.

Kéktan avan, èl l’avé tonm malad épi in bann voizin l’avé ronons ète kominis son plas. Donk mon papa téi oz pa done ali son biltin mé sé la pèrsone la di : do zèf té bien bon, lo kou d’sèk galman, mé téi mank in n’afèr. Téi mank lo biltin. Mon papa la di ali : moin la pa done aou biltin pars la di ou lé fine rononsé. La vièye la di : sak la rononsé, la ronons pou li, pa pou moin. Moin pèrsonèl moin la pa ronons lo kominis. Donk done amoin mon biltin siouplé.

Gramoun la donna li lo biltin é sé biltin-la li la koulé landomin. La roprésyon lété global sa lé bien vré, mé la rézistans èl osi lété global galman é sa sé in n’afèr a pa obliyé.