Sa la komanss par in kou d’azar é ti-lanp ti-lanp sa l’amenn azot dsi lo vré programme SRI. Konm mwin la di, la komanss diminyé lo tan pou ropik lo ri : té trante zour avèk lo SRA, la vni kinz é mèm épizapré la diminyé ziska uit zour-rante l’èr lo bande pti pouss do ri i sorte, ziska lo zour i ropike lo bande plant. Avèk in miltiplikassion lo randman, in miltiplikassion par dë sansa par troi.

Aprésa konm nou la vi la okipe la somans é la ropik lo ri in plant tou lé 35 santimète éspassé par in rigol sifizan pou lèss pass la hou : la hou i rash mové zèrb. In préparassion grin zavoka é sa i débarass avèk lo ra.

Rézilta : la kantité somanssla diminyé. Kan, la tradission i domande dë kilo lo grin pou 400 mète-karé astèr i fo arienk 750 gram pou lo même sirfass. Pou lo randman i fo konte rante douze é vin tone dori par éktar. In mirak par rapor lo tan lo sra avèk solman 2,5 tone léktar. Anpliss ké sa la diminyé la kantité d’lo pars lo ri la pa konm i di in plante akwatik - irigué oui, akwatik non – é li la pa bézoin dolo toultan.

Dopi ine il ziska lo monde.

Lo père Laulanié lé mor l’ané 1995, mé son métode é sète son bande dalon la pa rèst dann landroi lo Sri lé éné. In groupman i apèl Tefy Saïna épi Cornell university, la dévlope bande sante pou amontr bande plantèr lo plantaj Sri dann in bonpé landroi Madégascar. Lo métode la pa rèst la pars la parti in pé partou dann l’Afrik dé l’ouest, Cuba, dann Vietnam é partou la done bon rézilta.

Mézami mwin la pankor fini, mi lèss in pti pé pou lindi. Nou néna ankor dé shoze pou oir. Laulanié lé mor mé son métode lé bien vivan é tanmyé sa va ranpli lo boujaron bon pé d’moune i soufèr la fain.

Justin