L’avé, la pi mé sak sar apré lish son doi sar pa nou !

Matant Zélida la ékrir Justin :
Mon shèr nové, mon spès salté, rouj-de-fon dovan l’étèrnité, moin la antann dann télé zordi mèm dann lo kadr in plann konvèrjans La Rényon i sava toush sisan milyon pou dévlop in bann projé. Zot i oi bien kisa i sokour anou kan nou lé dann difikilté. Zot i oi bien sé La frans é zot i vé konm zot i vé pa sé La frans kantmèm. Alor, mon nové, in rafréshisman konmsa lé bon po ou konm pou tout bann rouj épi sak l’apré di é rodi La frans i koné arienk lésploitasyon La Rényon. Ou i koné listoir la poul i ponn zèf an or ? Mi paryé sé konmsa zot, bann rouj, zot i vé fé : tyé la poul zèf an or, pou gingn tout lo bann zèf d’in kou alé oir sa la pa posib. Tok ! Pran sa pou toi !

Justin la fé pou répons :
Mon vyé matant k’i koz toultan la boush rouvèr, mi koné bien zistoir la poul té ponn zèf an or. Mi koné galman in poul i gingn pa ponn plis in zèf par zour mèm si sé in zèf an or. Mi rapèl bien zistoir lo boug la sakrifyé son poul épi li la ramass i sèl zèf é pa plis. Mé matant, dsi la késtyonn plann konvèrjans, la pa zordi ni antann parl sa é la pa rienk zordi nout parti i di : in manyèr fèr konmsa lé pa bon.
Sak i fo sé in l’antant rant rényoné pou finans in plan bien koéran é pou amenn anou dsi la rout nout dévlopman an vré. Ki di plan, i di akor rant rényoné é pa akor rant kaparèr. Ki di plan i di dévlopman é la pa ditou sak gouvèrnman i parl zordi. Pétète zot i pans nout péi i sar gingn in konténèr larzan konm in pé téi di dann tan, mé na poinn konténèr larzan é lo larzan va rantré sar gaspiyé an katriyèm vitèss pars li rant ar pa dann in plan global é kan nou va rogardé, nou va di : « L’avé, la pi, kosa la fé sanm sa ? » é in pé va lish zot doi mé sar pa nou. Tok ! Pran sa pou ou !