Médam, zé méssyé, la sosyété koz èk mwin sé koz èk in kouyon, mé sé o pyé d’lo mir k’i oi lo masson. Mézami, mi koné pa kèl koté kozman-la i sorte, mé i prétan sa sé in kozman bann zindien l’Amérik la lèss pou zot bann désandan. Mé la zamé di, zot néna konm in droi d’otère dossi, é mi pé pa san zot lotorizasyon mète sa dann zoinal. Mé, konm mwin la fine di souvan-défoi, sak lé vré pou zot laba, lé vré galman pou nou issi. Mé o-fon kossa sa i vé dir ? Promyé lidé i vien dann mon tète sé ké pou donn in l’avi, in moun i baz ali dsi son prope léspèryans la vi : lé vré toulbon, pars mi oi pa oussa mi sava tir in l’avi si lé pa dann mon léspèryans la vi. Dézyème sans, mi pé tire sa dann sak mwin la lir, sak mi koné d’la vi d’moun, mon rolijyon ou ète in n’ote, mé sanm pou mwin ni artonm parèye lo promyérman. Sof ké la pa mon vi èlmèm mé sak mwin néna dann mon tète afors tourné rotourné mète sa dann mon panssé é finalman dann mon vi amwin. Donk la pa arienk mon vi k’i pé done amwin in l’avi, la vi d’ote moun galman, é la vi bann pèrsonaz mi koné afçrs travaye, afors lir, afors fé viv azot dann mon panssé.. Akoz pa ? Alé ! mi kite azot rofléshi la dsi é ni artrouv pli d’van. Sipétadyé.