Matante Zélida la ékrir Justin :

Mon shèr nové, mon spès salté, rouj-de-fon dovan l’étèrnité, mi pans ke sé shé zot bann jennn la trouv drol z’idé konmsa : sète bann z’étudyan k’i vanj par raport lo shomaj alé oir zot i doi z’ète plis okipé par z’ot bak k’i ariv ké par lo travay ké zot i pé mèm pa domandé zordi. Moin lé sir, sé zot la bour lo krane bann marmay-la, avèk sa. Pars di amoin in n’afèr, si zordi zot l’apré grévé zot la ! I di azot alé lèv travaye, zot va réponn la pa l’èr pou zot lèv travaye pars zot lé pa dann lo ka de rod travay. Donk zot lé lansé dann in grèv k’i intérès pa z’ot ka, zordi. Tok ! Pran sa pou toi !

Justin la fé pou répons :

Mon vyé matant k’i koz la boush rouvèr, si mi konpran aou, bann marùmay la tor vanj kont in l’ékol i fabrik solman bann shomèr. Z’ot gran tor, sré d’fèr romark bann gran diréktèr l’édikasyon nasyonal ké z’ot bato i pran lo fon. Olèrk prépar bann jenn pou inn vré vi d’travaye, i prépar azot pou in vi d’tir dyab par la ké… Matant, vi pans bann grévis la tor é nou ni pans ké sé la promyèr foi ké zot na rézon konmsa. Alor dopi l’az troi z’an, ziska l’az dizuit z’ané, ziska plis ankor apré, bann jebnn rényoné i doi kass z’ot koko, pou déboush dosi arien. Vi trouv pa lé révoltan ? Vi trouv pa ké zot i doi révolté afors i tourn azot dsi zot mèm konm toupiy san naye. Eskiz mon pardon matant, sé banna ké na rézon sé pa sak i done azot tor zordi : l’avnir va donn azot rézon. Tok ! Pran sa pou ou !