Matante Zélida la érir Justin :
Mon shèr nové, ou i oi oussa in mové l’édikasion i amène zanfan d’moun ? In pé i kroi tout z’afèr lé bon a fèr : nana marmay ankor jène i boir lalkol, i fime zamal, épi i pran kashé. Aou paran, ou na in sèl solision, sé fèrm out také épi lès marmay fé sak zot i vé. Aprésa, kan la fine pass la borne, kan i gingn pi artourn an arièr, ni fish par koté, trouv kansréti in pti shomin pou sort dann fénoir, alor i tié lo kor, i suisid, sétaki i tinn son fanal. A ! lé zoli ? Épi, lé fasil akiz la sosiété konm zot bann rouz fonsé i pass lo tan pou fé. Bou di kont, sé bann moun konm zot lé résponsab...

Justin la fé aèl pou répons :
Mon vié matante, moin pèrsonèl, mi trouv i fo pa kozé kan ou i koné pa sès-ké l’arivé pou vréman. Épi, mi trouv in pé bann madam lé tro maltrété an parmi la sosiété pou alé akiz azot ankor an avoir fé si, an avoir fé la. Sak mi koné, sé k’in jène madam aproshan vintan lété trouvé mor. In krime ? in suisid ? Mi koné pa, mé so z’afèr l’arivé, épi nana in bann famiy dan la tristès. Alor, mète la fote déssi lédikasion ? Matante, demoun-la, sa i yin pa bou drès azot konm zanimo i tourn dann fime, sa !... Ou lé zamé sir lo zanfan la profit bien sansa mal l’édikassion la famiy la doné. L’édikassion, la pa in sians égzakt !

Justin