Matante Zélida la ékrir Justin :

Mon shèr nové, mon spèss salté, rouj-de-fon dopi l’étèrnité, mwin la lir sak ou la ékrir yèr dsi out bann kouzin la bénéfisyé an promyé l’égalité alé oir bonpé d’moun dann l’androi la pa vi so l’asansèr sosyal-la, mé mwin lé a d’mandé pou kossa ou i ékri dé shoz konmsa. Lé vré nou la pa gingn légalité sossyal lo promyé zanvier 1947. Lé vré nou l’atann in bonpé d’tan avan d’an avoir ali mé ozis, afèr roproshé ? Afèr pa kontante anou sak nou la gagné firamézir mèm si toulmoun la pa gingn lo mèm zafèr an mèm tan. Shakinn la gingn in pé é sé sak i konte an final. Tok ! Pran sa pou toi !

Justin la fé pou réponss :

Mon vyé matante k’i koz toultan la boush rouvèr, mi konpran pa fasson wi fonksyone épi kèl sé out bann valèr aou… Pou kossa mi ékri sa ? Pars d’apré mwin gouvèrnman La Frans la trouv l’ané 1946 in sosyété kolonyal, inzist, inégal, san fratèrnité, é li la ranplass sa par in n’ot sosyété kolonyal, inzis, inégal, san fratèrnité, alé oir nou l’avé pa domann sa. Nou l’avé domann l’égalité in poin sé tou é nou la kour déyèr san trapé é konbienn tan siouplé ! konm lo shanté i di : kour déyèr an atandan, santrapé bienantandi.

Demoune péi loutre-mèr l’avé pa dmann sa : ni lo bann dirizan, ni lo bann militan, ni la sossyété dann son ansanm. La loi 19 mars 1946, lété pa in loi d’inégalité, an kontrèr son bite sété l’égalité, assossyé avèk la libèrté épi la fratèrnité…nou la pankor gingn trapé ziska l’èr d’zordi pars i mank anou in sityassion a popré parèye pou toulmoune : shakinn son pla pou manzé, shakinn sonvi plizoumwin aksèptab, shakinn son lédikassion a popré konm k’i fo.

Konmsa bande dorizan épi bande miliatan, épi galman la popilassyon ti oi lé shoze… Pa Konm in lign d’orizon, i éloign firamézir ni aprosh.

Tok ! Pran sa pou ou !