Oté

L’égalité konm in lign d’orizon i éloign firamézir ni aprosh

Justin / 20 novanm 2019

JPEG - 43.6 ko

Matant Zélida la ékrir Justin :
Mon shèr nové, mon spès salté, rouj-de-fon dopi l’étèrnité, moin la lir sak ou la ékrir yèr dsi out bann kouzin la bénéfisyé an promyé l’égalité alé oir bonpé d’moun dann l’androi la pa vi so l’asansèr-la, mé moin lé a d’mandé pou kosa ou i ékri dé shoz konmsa. Lé vré nou la pa gingn légalité sosyal lo promyé zanvier 1947. Lé vré nou l’atann in bonpé d’tan avan d’an avoir ali mé ozis, afèr roproshé ? Afèr pa kontant anou sak nou la gagné firamézir mèm si toulmoun la pa gingn lo mèm zafèr an mèm tan. Shakinn la gingn in pé é sé sak i kont final man. Tok ! Pran sa pou toi !

Justin la fé pou répons :
Mon vyé matant k’i koz toultan la boush rouvèr, mi konpran pa fason ou i fonksyone épi kèl sé out bann valèr aou… Pou kosa mi ékri sa ? Pars d’apré moin gouvèrnman La Frans la trouv l’ané 1946 in sosyété kolonyal, inzist, inégal é li la ranplas sa par in n’ot sosyété kolonyal, inzis, inégal alé oir nou l’avé pa domann sa ; nou l’avé domann légalité in poin sé tou é nou la kour déyèr san trapé é konbienn tan siouplé !
Demoun péi loutre-mèr l’avé pa dmann sa : ni lo bann dirizan, ni lo bann militan, ni la sosyété dann son ansanm. La loi 19 mars 1946, lété pa in loi d’inégalité, an kontrèr son bit sété l’égalité…nou la pankor gingn trapé ziska l’èr d’zordi pars i mank anou in légalité nout tout la poin an mèm tan sé l’égalité dé shans é sa sé in n’afèr la rofiz anou an débitan.. Konm in lign d’orizon, i éloign firamézir ni aprosh.
Tok ! Pran sa pou ou !