In zour, gouvèrnman La Frans a déside la SNCF lé tro gro. L’èr-la, la di bann réjyon, okip zot mèm z’ot bann lign réjyonal. Bann réjyon la komans ral konte, pars fransh vérité inn-dé train réjyonal lété in pé an dégréné, l’avé mèm viéyi plis k’i an fo. Donk gouvèrnman la di, va vèrs azot in rant férovyèr, konm sa si la bézoin romète lo train an form, bann réjyon va nyabou fé. Mèm si bann réjyon té i méfyé l’État, vi k’souvan défoi, sé in razèr d’pinte, zot la aksèpté. Bon kèr, mové kèr zot la aksèp lo z’afèr.

Issi La Rényon, na sinkante an la dégrène nout train. Na poin lontan, konsèy réjyonal la déside fé in tram-train. Sa té i doi koute in milyar édmi l’ero. L’État, an gran vaza, la di li donn kat san sinkante milyon, donk trant pou san. Par-la, solman pa in train instalé, fète é fourni konm dan La Frans, mé in train an shantyé. La Réjyon, pou son par, l’avé in milyar pou péyé.

Solman l’avé dépans inprévi, konm lo pon déssi la rivyèr Saint Etienne. La dégrène in kou san k’pèrsone i konpran koman. L’èr-la, la di gouvèrnman vèrs in rante férovyèr konm an Frans a partir l’ané 2014. Inn i di oui, épi in n’ote i di non. Inn i di i fo vote in loi, l’ote i di i vote ar pa d’ loi ditou. Ziska lo 31 mé, kan Promyé minist la di konte pa dsi, é lo nouvo patron la réjyon la di : "Oui mon blan !". Pou in tan, tram-train la kalé
Mé, konm di lo konte, l’égalité lé pi sak li lété ! Sansa ankor:toute lé égal, mé pli z’ou moins !

Justin