Kan la parl l’égalité réèl, moin la pans sa lété in bon n’afèr pou nou, rényoné. Pou kosa ? Pars pou moin, nou té i sava ratrap La Frans pandan in pèryod vin-t’an : ranfors nout poin fèb, baz dsi nout poin for pou aminn anou plis an avan. Pou moin, sa té i doi amènn anou dann shomin nout dévlopman réèl : arienk sa mon fra !

Mé ala pa ké tou d’in kou ni antann in l’ansien prézidan Sarkozy apré di li lé pou lo l’égalité réèl pars sa i kout ar pa tro shèr pou lo bidzé La Frans. Konm mi koné ali pou lo pli gran razèr d’pint ké nana dsi la tèr - sof Hollande konm li aparète zordi - moin la pans toutsuit nout kanar té noir. I sava raz anou a-sèk. Boudikont tir sak i pé dsi nou mèm pou fé konmsi i anrishi anou.

Ala ké mi antann i koup tout suit la moityé la sir-réminérasyon bann fonksyonèr san ké sa i rès La Rényon. Ala ké mi antann i siprime lo trant pour san l’abatman dsi z’inpo. Mi antann ankor i mète dé-troi poin la Tva dsi nout marshandiz.

Gran prométèr, pti donèr ! Moin té i pans kant mèm pa l’égalité réèl lété sinploman, pou émite kozman mouton ; pou manz la lène dsi nout do