L’égalité réèl ? Nora in déba ! Myé vo tar ké zamé, vyé motar ké zamé !

Zordi nou lé dann l’ané 2016. Dann mèm pa dis moi n’ora in z’élèksyon prézidansyèl é ala ké toudinkou lo gouvèrnman i lans son prozé pou l’égalité réèl apré an avoir romark in n’afèr, konm tout sak la pankor pèrd la vu, ké soisant-dizan apré la loi départman fransé nou lé ankor dann l’inégalité réèl.

Toudinkou ? Non va, pars sa i fé près in an i parl de sa mé lé shoz i avans la vitès in torti. Pou kosa ? Pétète pars mésyé Hollande i kont la dsi pou fé vote bann gogo l’outre-mèr pou li. Alor kosa nana la-dan ? Mésyé Lurel, l’ansien minis l’outre-mèr la fé in gran rapor dsi la késtyon. Mi pans sak la lir sa, lé rar konm korn lapin dann tout la répiblik. Touléka, li la pa gingn in gran plas dann bann télé, konm dann lo dé zournal la droit, dann lo program bann parti.

Ni pé dir lo dévlopman andojène mésyé Sarkozy, dann lo tan, l’avé fé la ine l’aktyalité é lo plan pou la kominikasyon la myé marsh ké sète l’égalité réèl-dis, san foi myé mèm si lo l’aplikasyon la klosh in pé, bokou, ala foli, pa ditou konm i di dann zistoir marmaye.

Astèr in projé pou li marshé i fo ké li lé porté. Parti sosyalis dann l’outre-mèr i port pa sa ditou. Mèm ké la sogrétèr d’éta pou l’outre-mèr la komans par dir él sé la sogrétèr pou tout la Frans donk l’égalité sré pou tout La Frans !!. La droit lé pa la èk sa, zis in n’afèr èl i vé sé pass in shos-trap mésyé Hollande é fini avèk li. Lé z’ot mouvman, lé z’ot parti la trète sa konmsi lété in gadjète prézidansyèl. Na arienk nout parti, apré an avoir fé in travaye dsi la késtyon la domann in gran déba la dsi.

Zordi ni antann dir i sava fé lo déba é nou lé kontan pars san in vré déba la pa moiyin fé avans lé shoz konm k’i fo. Kan i fé ? koman i fé ? Kèl sé lo plan pou an ariv la ?… Moin pèrsonèl, mi trouv lé bien tar mé konm di lo kont i vo myé tar ké zamé_é konm k’i diré in éspésyalis la kontrpètri : « Vyé motar ké zamé ! »