In vyé dalon mi koné bien. Mèm inn an parmi sak la fé La Rényon koméla na poin lontan la sonn amoin. Sanm pou moin li la poz amoin sak mi pé apèl in fo problèm, é li la poz amoin in vré problèm, in problèm de fon.

Dann in mèm fraz li la di amoin, li lé pou lo rotour bann shagosien dann z’ot péi natal, mé li domann sirtou koman ni pé débaras anou avèk lo kolonyalism fransé. Donk sanm pou moin, noré d’apré li in sort kontradiksyon rant nout pozisyon « intèrnasyonalis » épi la nésésité pou nou « dékoloniz nout péi ».

Antansyon li la pa di amoin i fo pa ède bann shagosien dann z’ot konba pou rotourn shé zot, dann z’ot péi natal. Zamé li noré di in n’afèr konmsa vi son zidé antikolonyalis anti inpèryalis de tou tan. Mé, sanm pou moin li noré lèss amoin antann ni pouré shoizir rant nout pozisyon internasyonalis épi nout posisyon anti kolonyalis. Si la pa sa, moin lé sir li va sonn amoin.

L’èrla mi domann amoin si nou néna in shoi pou fé rant vanj pou nout libérasyon épi ède lé zot dann z’ot libérasyon. Pou moin non, ni doi mène not prop konba épi ède lé zot dann z’ot prop konba. L’égoïsm na poin son plas dann la lite bann pèp.

(la pankor fini-domin pou la suit)