Yèr moin la anparl dsi l’internasyonalis épi l’antikolonyalis é moin la di, pars mi pans réèlman : inn avèk l’ot i doi marsh min dan la min dann la lite bann pèp. Isi dann l’oséan indien, sa sé in n’afèr sir é sèrtin.

L’èrla, dann mon pansé, mi rotourn in pé an aryèr pars sak té vré yèr, lé vré zordi, é lé riskab ète ankor vré domin. Pou kosa mi di sa ? Pars nou, bann pèp l’oséan indien nou néna bann gro problèm avèk lo kolonyalis fransé épi bann z’inpéryalis zanglé épi zamérikin.

Madégaskar : kolonyalism fransé la profite bon rolasyon li l’avé avèk Tsiranana pou dépouye nout voizine é pran pou èl bannzil dann kanal mozanbik Komor ? Fran CFA i sis lo san son pèp, é si li lé pa dakor konplo, konplo, konplo. San parl la késtyonn Mayotte. Moris ? Dépouyé par bann zanglé par la féblèss son gouvèrnman. Bann chagosien égzilé par la fors épi par la riz. Nou, k’i ariv pa a dévlop anou korèktoman dann la libèrté épi la résponsabilité pars kolonyalis fransé lé touzour apré mète lanspèk dann nout shomin an bazan dsi bann profitèr mèm konplis.

Néna in ta d’rézon pou nou ète solidèr, pou nou ède inn a l’ot mé la pa konmsa la éspasé :
La Frans la vol nout plas dann la Coi é tout nout bann kouzin ziska zordi la pa bouzé. Komor, la gingn in kantité problèm é bann frèr épi kouzin lété zamé solidèr. Zé dé zil, komor lété imilyé san réaksyon lo bann zéta : pli pir néna inn dann bann péi la pran son tour pou roganiz zé dé zil. Pa in sèl foi la késtyonn Chagos lété porté dovan la Coi. Alon pa parl la fason désèrtin i agard anou konm l’om malad l’oséan indien. Loséan koté Mayotte sé in gran simtyèr pou bann komorien é tout i éspass konm si arien n’été.

L’èrla ni doi poz lo késtyon : nou lé pli for si shakinn i ral son koté, sansa si toulmoun i ral ansanm ? Si toulmoun i ral ansanb ! Sa lé sir. Oplis nout solidarité rant pèp l’oséan indien sar for épi sar solid, oplis ni pé gingn fé rokil bann kolonyalis épi bann z’inpèryalis. Astèr ni pé dir galman in Rényon dékolonizé i pé z’ète pli éfikas dann son l’ède par raport lé z’ot pèp apré lité.