Soi ou i gingn fé in n’afèr, soi ou i gingn pa. Si ou lé pa in moun konsékan, ou i pé promète, ou i pé ménasé épi apré ou i rotir aou an zourite, san fé arien. Demoun va oubli aou. Va oubli out ménas sansa out promès épi sar pa pli grav ké sa. Mé si ou, sé in moun inportan, lé difisil fé in n’afèr konmsa pars demoun va pans, ou la dégonflé. Si ou sé in minis é si ou i roprézant in gouvèrnman, dégonflé sa lé pa in onèr pou ou, sa lé pa non pli in onèr pou lo gouvèrnman.

Mi vé parl problèm lésans. Pars, si mi tronp pa lo minis Lurel l’avé promète in bès sis santime é d’apré sak l’apré éspasé, i fé pa l’èr nora in bès. Amoins ké béssé, sé rèst parèy, sansa sé pa goumant in bonpé ? L’èr-la, sé in n’afèr in pé konpliké pou nou, bann moun sinp. Pars pou nou, béssé sé diminyé, monté sé goumanté. Pou nou, napoin tro niyans dann in n’afèr konmsa. Sirtou ké bann pyès avèk bann biyé l’ero i zoué pa tro kas-kou dann nout port-moné.

Dakor ! Donk alon rode in boukémisèr, in moun pou port la résponsabilité. Lé pa difisil ! Alon mète l’otèr dsi Didier Robert : lé pa konpliké, é mèm i pé ète in kou d’zèrgo, sansa in kou d’bouton*, pou prépar son ranplasman par in sosyalis. I fo dir lo boug lé pa rokonésan ! Sé kant mèm bann sosyalis la mète ali anlèr, épi bann sosyalis péi la pa mank félisit ali. Arzout èk sa, li la mèm poin léskiz an avoir donn in l’élan bann zénèrji prop. An kontrèr, li la pass banna kal !

L’èr mi ékri, lo tik-tak lo tan i dégrenn firamézir : tik-tak, tik-tak, tik-tak... Préfé dann son biro daoir la fine gingn in kou d’shalèr. Lurel la-ba dann Paris i komand pi arien. Rényon promyèr, dann son zournall midi, la di d’moun alé vit ranpli zot rézèrvoir lésans. Kèl trin ! Kèl trin !

Justin

*langaz batay kok.