Matant Zélida la ékrir Justin :
Mon shèr nové, mon spès salté, rouj-de-fon dovan l’éternité,
Zordi, bann marmay l’ékol lé an vakans, é i tard pa la rantré i arvien. La vi bann marmay lé konmsa zordi. Lontan té sa : l’avé touzour in korvé pou fé, é vakans lété la arienk pou lo nom. Pars, mi an souvien bien, matin-o-soir té i falé fé korvé. Distraksyon ? Zéro. Shanjman l’aktivité ? Zéro kalbas la fimé. Shanjman d’èr, pou l’moun navé lo moiyin ! Zordi, lé pa parèy : marmay i amiz. In pé i sava an kour ratrapaz. Vréman lo tan d’zordi lé pa konm lo tan yèr. Mé ala k’mi antann dir na in gran kantité marmay i kit l’ékol san an avoir in diplome. Moin lé a dmandé pou kosa. La fot la parès ? Lo mové l’édikasyon bann paran i done z’anfan ? Sansa bann z’idé tort bann rouj-de-fon i mèt dan la tèt bann marmay épi bann paran ? Mèm dan la tèt bann z’amontrèr ! Tok ! Pran sa pou toi.

Justin la fé pou répons :
Mon vyé matant k’i koz touzour la boush rouvèr, si ou té i égzis pa, noré di invant aou,
Kan ou i rod l’ésplikasyon in problèm, lé pa difisil pou ou. Ou i sava ramas par bouké la kouyonis i trène partou épi ou larg sa konmsa dann zorèy demoun. Poitan, ou i koné, la pa pars i répèt kékshoz in bonpé foi ké sa lé vré. Pou èt vré, i fo in vré démonstrasyon : konm mi pans in vré l’ankèt, sa lé plis valab k’in kozman la boush rouvèr. Na kant mèm in n’afèr, sanm pou moin, i pé ésplik l’éshèk éskolèr. Sé l’inégalité rant bann marmay késtyonn l’édikasyon, dan la sosyété, épi dan zot famiy... In l’égzanp : I paré z’anfan bann amontrèr i aprann myé l’ékol. Sa lé vré, é si lé vré, sé pars lo z’anfan i gingn in soutien d’ot i gingn pa tro... Sa sé in z’ésplikasyon, mé nana d’ot bien sir. Plizyèr z’ésplikasyon i vo myé k’inn tousèl. Tok ! Pran sa pou ou !

Justin