Mèrkrodi soir, Paul Vergès la fé in kozman dési lo l’éshofman klimatik épi kosa i fo fèr pou évite in maksimom dézagréman. Pars pou an avoir dézagréman, nora, é pa arienk in pé, sirtou kan in bann péi i s’anfou d’sa. Sirtou kan in bann kapitalis i rode gingn larzan toutsuit, mèm si la tèr lé riskab afayir in bonpé. Zot lé pa la èk sa ! Zot i vé kontinyé ésploite pétrol, ansèrv sharbon, anploy lo gaz... é si tazantan zot i anparl dévlopman dirab, la pa séryèzman, la pa pou de vré.

La prèv, pou l’ané 2010, bann péi dévlopé épi bann péi émèrzan la pa réspèk sak zot l’avé promète : la bate lo rokor pou fane lo gaz l’éfé d’sèr. Si i kontinyé konmsa, la pa dé dégré la tanpératir va goumanté, la pa in mète nivo la mèr va monté. I kont ar pi lo nonm zil va anfons dan la mèr, i kont ar pi lo nonm landroi plate, la mèr va noiyé, i kont ar pi non pli lo nonm bann réfijyé klimatik ! Arzout èk sa, bann landroi va vni dézèr, lo nonm landroi sar ravazé avèk siklone é tout sort tablatir klimatik.

Mé nou dann tousa, kosa ni dovien ? L’étan Sin-Pol, l’étan Sin-Loui, la rivyèr Sin-Dni, Koloss, la marine Sin-Bénoi, Kartyé la Rivyèr dé Rosh, Saline lé Bin... é la suite, kosa i dovien ? Kouk i fé pou prévnir déga ? Mé nout bann dalon Maurice, Sésèl, Komor, kosa i dovien ? Maldive : konbien zil i sar anfons ankor dann lo la mèr ? Moin la zamé antann la mète o-poin in plan pou prépar l’avnir nout réjyon. In plan séryé, pa in plan dsi la komète. Somanké, in pé i pans ni risk pa arien. Pétète désèrtin i kroi, si ni bouz pa, bann shanjman klimatik i toush ar pa nou ; Pétète zot i majine i sifi ni fé pa romark anou ?

Kosa i fé ? Koman ni fé ? Konm défin Gribouy, ni zète anou dan la mèr, avan k’èl i mont pou ral anou ? Konm bann plantèr la Frans, pli to ké plante mayi, zot i vé plante mayi pinm ! Sansa nout tout i monte dan lé-o ? Séryé lé ga : sanm pou moin, prévnir sé guérir.

NB : Mayi-pinm : sanm pou moin, sa mèm i apèl sorgo (sorgho) sansa gro miyé (gros mil)... banna l’apré fé léséyaz an Frans pars nora pi asé d’lo pou plant mayi.

Justin