Médam zé méssyé, la sossyété, koz èk mwin sé koz èk in kouyon mé sé o pyé d’lo mir k’i oi lo masson.

Mézami yèr mwin la pass dovan in kolèz banna l’avé done lo nom « Boris Gamaleya » é sa la rapèl amwin gayar-gayar souvnir. Par égzanp dann tan Témoignages téi pibliye an fèyton lo lékssik Gamaleya la fé, nou lété in grape militan nou téi pran noute poz dann la kour nout zoinal dann la ri Maréchal Leclerc é sé konmsa k’in zour nou la bite dsi lo mo mwin la marke an-o la.

Sa sé listoir i éspass dann kar kouran-d’èr touzour bondé si tèlman k’in bononm blan té assiz in zou di lo syèz, in zou dsi in madam noir té assiz a koté é oila ké lo madam i antropran lo yab épi i di : « Pars mwin lé noir, ou lé blan wi kroi wi pé assir dsi mwin ? ». Lo boug la pa réponde pars késtyonn bagou mi panss li lété batu d’avans, li la solman bouz bouz in pti pé mé koman trouv la plass dann in kar tro plin ?

L’èr l’arivé pou lo boug déssande mé lo madame l’avé pa obliye ali é kan li té fine ariv atèr lo fanm la pran son kouraz dë min épi la kriye in kou :

« Alé aou ! Mon léspèss assizèr dsi ! »

Astèr pé s’fèr sa sé in zistoir i rapèl azot kékshoz mé an atandan ni rotrouv pli d’van.

Sipétadyé bien antandi.