Zédi aprémidi, moin la parti lantèrman in bon kamarade dépi in bon koup de tan moin l’avé pa gingn l’okazyon oir ali. Péi lé pti, sa lé vré, mé la pa pou sa i pé pa pèrde dé vi inn-a-l’ote... é kan ou i antann in nom dann radyo déssi l’kou d’midi par-la, sa i vé dir out dalon la fine alé koté d’tanto, dann l’otèl i rofiz pa z’invité. L’èr-la, i rèss aryink pou alé rann in dèrnyé vizite, konm i di, pou akonpagn oute dalon dann son dèrnyé voiyaz.

Shak foi mi sava in sérémoni d’mortalité, mi èm ékoute la famiy, lo bann zanfan, sansa lo bann ti-zanfan apré lir z’ot modékri pou z’ot défin. Nana byinsir l’émosyon dann z’ot kozman, byinsir nana santiman, é manyèr banna i tourn sa, ou i vé, ou i vé pa, i mète aou in pé la tristès dann kèr. Sak ou i romark galman, sé la kapasité so bann jènn pou konpoz in zoli modékri, pou ofèr sa z’ote défin épi l’moun sak lé la... Alor, mi pans dann mon kèr, zamé dann tan lontan, zamé dann tan moin té jènn, l’avé in bon pé d’moun té i gingn fé in n’afèr konm sa : ékrir, byin ékrir... lir é byin lir, épi fé pass in bon l’émosyon... Pou kossa ? Pars l’avé in mank l’instriksyon, l’avé galman in mank konfyans, é in mank dé sékirité pou koz an piblik.

Solman, oila, na ankor si tan tèlmann moun lé ilétré, lé konm invalide dovan la léktir épi l’ékritir. In pé dan la bann la parti lékol ziska l’az sèzan é zot la pa aprann granshoz, é sa lé byin domaz. Sirtou, kan ou i rann aou konte, par ou mèm, bann z’ilétré lé pa pli bète ké sak lé pa ilétré. Alor ? Alor sa i vé dir nana konm in mashine lé pa bon, i marsh pa konm k’i dovré, la bézoin in bon romiz an éta... Konm di lo konte, lé tan prann lé shoz par lo bon boute pou défrish l’ilétrism dann nout péi.

Justin