Dann mon zénérasyon l’avé in bon pé d’moun z’ot famiy té ilétré. Ilétré sé koué ? Si mi suiv diksyonèr la lang fransèz in z’ilétré sé in moun nana in bonpé difikilté pou lir é pou konprann in sinp fraz. Tan k’a ékrir pou zot lé ankor pli difisil touzis si zot i koné sign z’ot nom. Dan la bann l’avé mèm in bonpé d’moun lété analfabèt : sèt-la lété ankor in dogré an dsou. Mèm lir in sinp mo zot té i gingn pa.

In bon kamarad la ésplik amoin son famiy lété ilétré donk èl l’avé difikilté pou lir in pti tèks sinp. Solman la momon té i vé, absoliman, son bann z’anfan i koné la priyèr : tou lé soir-é té i mank pa inn !- bann z’anfan téi di la priyèr otour d’lo li bann paran é bou-di-kont té i fini par konète lo priyèr par kèr. Mé kèl priyèr ? Bann priyèr sinp konm lo notro pèr, lo zé vou salu Marie, é lo zo kroi z’an Dyé.

Solman té i résit oui, mé souvan dé foi lo bann mo té gaskoné si tèlman ké bann marmaye épi bann z’adult téi konpran pa tout sak zot i résite. Aprésa kan zot té i sava katéshis, konm téi fé dir lo z’afèr an group, sak l’avé rant dann z’ot tèt tanm-pti té i rès ziska k’in zour zot té té ariv a dékod sak zot la aprann si zot la bien parti lékol.

In bon kamarad la di amoin pandan lontan li la di « votrègn ariv » ziska kroir lété in moun k’i ariv. Lontan li la di « notro pèr k’i ète zo kyèrk » olèrk « z’o syèl » épi in ta z’afèr konmsa-é zordi d’apré zot ? I di nana plis san dis mil z’ilétré é lo ta i fonn pa. La pa zordi va fonn toultan ké l’édikasyon nasyonal de Frans va okip instruiye anou.

L’instriksyon dmoun sé in n’afèr tro sèryé pou konfyé sa l’édikasyon nasyonal fransé.