Yèr, moin la anparl azot koman l’asimilasyon la foiré. Zordi mi vé anparl azot l’intégrasyon. Pars l’ané 198, kan Mitterrand la port zéléksyon prézidan la Répiblik, li la promète mète in frin sanm l’asimilasyon, mé li la di galman li va zoué la kart l’intégrasyon a fon. I paré nout bann kamarad dirizan, si zot la di zot dakor avèk lo promyé poin, zot la di ali, l’intégrasyon, sa in n’afèr zot i shas pa avèk. Poukoué ? Pars la pa li la va pèrmète La Rényon bien règ son bann problèm. Vitman-vitman li sar o boutlo roulo.

Lo tan la passé. Mitterrand la domann k’i rotir lo mo d’ord l’otonomi. Li la promète anou in l’asanblé inik. L’afèr té mal goupiyé é sète-la la foir galman. Mé l’intégrasyon la suiv son kour. Firamézir, nou la romark sa téi amène pa nou dann in bon shomin pou trap in dévlopman konm k’i fo. Konm k’i fo ? Sa i vé dir in bon dévlopman nout prodiksyon dann l’agrikiltir, dann l’indistri, in ranforsman nout zésportasyon kansréti pou ékilib in pé nout komèrs ékstèryèr. Sak nou l’avé di, malorozman, l’arivé é nout sityasion lé konm èl i lé zordi.

Final de kont, sa lé pa étonan. Pou kosa ? Pars l’intégrasyon lé in pé konm l’asimilasyon, la pa sète nout kiltir, é nout l’idantité, mé sète nout lékonomi, sète nout sosyété alé oir nou, étan sou-dévlopé, nou lé pa an l’éta pou konkirans in lékonomi é in sosyété dévlopé konm La France. Oplis i ède anou, oplis nout lékonomi i vien frazil. Oplis i ède anou, oplis bann sosyété monopol i gonf zot pla sinploman an shanjan bann gro larzan piblik an gro larzan privé, dann zot posh. Pou fini, ni pé di :"L’intégrasyon ? Sa té in bon téknik pou foute anou d’dan".

NB : sé sak i ariv tout bann péi l’outre-mèr fransé. Pars lé kant mèm drol tout bann péi l’outre-mèr lé dann in ka konm la not...

Justin