Matante Zélida la ékrir Justin :

- Mon shèr nové, mon spès salté !
A bon ! Lé konmsa alor ! Mi savé pa z’ot MCUR lété konm in gouf pou zèt larzan anndan. Éstèr, mi koné, pars moin la byin antann sak demoun la di é moin la byin konprann. Pa bézoin anparl lé zot zafèr, alon anparl solman larzan, piské, i paré, sa sé l’nèrf-bèf la guèr...
In moun byin intélizans, vik sé in diréktèr d’kolèz, la di : avèk so larzan va dépansé nana moiyinn moiyéné, konstrui sink lisé épi sèt kolèz. Sa lé séryé sa ! Akoz i èm gaspiy konmsa larzan piblik ? Na pli myé pou fèr èk sa, sa lé sir. Alé ! Pran sa pou toi épi tout la koloni bann rouz-de-fon.

Justin la fé aèl pou répons :

- Mon vyé matant !
Mi oi vi suiv laktyalité, mé ou i suiv-sa dovan-déyèr ! La MCUR va kout par-la 85 milyon l’éro. Na in lisé i sa fé la-ba Sint-Ann lé prévi pou kout 35 milyon l’éro épi rosoir mil zélèv. Donk la MCUR va kout, gran maksimome, lo pri dé lisé modèrn HQE.
Mé li pran pa lo larzan pou fé lo lisé, vik lé prévi in plan pou fé tout lisé nout zénès la bézoin dan lavnir. Matante, si in diréktèr d’kolèz la di sak ou i di, bin pétète li lé in pé instruiyé, ankor i fé pa tro l’èr, mé l’intélizans i mank ali. Sèt-la, in bon pé ankor !

Justin