Lakey lo sit > Chroniques > Oté
L’intéré zénéral sé l’intéré La Rényon, é sa son méyèr défansèr té Paul Vergès sof érèr
mardi 16 zanvié 2018, sanm
I paré mésyé Didier i dékolèr pi dopi son kandida pou vnir prézidan konsèy zénéral la koup la manké. Moin pèrsonèl moin la poin arien ni pour ni kot sa. Sèl z’afèr moi la pa bien konprann lo fonnn l’afèr. Moin la pa bien konprann dsi kosa lé z’inn é lé z’ot lé pa dakor é an kosa sa i konnnnsèrn La Rényon.
Pétète zot va dir amoin kosa mi sava rode la-dan. Pou kosa mi rode dé shoz lé pa dann l’ord di zour. Si lé dé kandida téi propoz shakinn in politik diféran i sifiré mète tousa dsi la tab é domann shak konséyé pou kisa li vote é pou kosa. An kontrèr si inn konm l’ot i propoz lo mèm politik, i sifi tir o sor pars mi oi pa koman zot i sava débarbote azot la-dan. An touléka, mi oi, koman la fé : i paré, sétaki la négosyé son voi pou la valèr k’ii vo o pli ofran.
Mésyé Didier i pans in pé la roul ali kari sou d’ri é sa sé in n’afèr i fé pa plézir ali. Pars késtyonn shoviy gonflé, mi trouv li lé bon. Konm zanfan gaté mi trouv li lé bon galman si tèlman ké ala ké li di in pé va pètye ali kan v’ariv zéléksyon l’mèr. Li la fine dir l’ané 2020 néna désèrti i ging ar pa z’ot post é li di kisa va pèye ali pars solon li li néna asé d’fors pou fé pèrd inn dé konm Sinimalé, Virapoullé, Annette épi Michèl Fontaine.
Lo mèr Sintandré pou son par, i done léson. Li di, i fo baz dsi l’intéré zénéral, kan ou i amène i politik. Intéré zénéral ? Sansa l’intéré partikilyé ? Intéré zénéral sansa biznès ? Moi pèrsonèl, moi téi koné kisa té i pratik l’intéré zénéral kan li lété la réjyon : sé in ga téi apèl Paul Vergès é a park li, mi oi pa bien lé z’ot pars pou nout kamarad Paul l’itnéré zénéral lété l’intéré La Rényon é an plis li lété vizyonèr konm shakinn i koné dan tout sak li té i antropran.
Pou sak lé o pouvoir koméla z’ot rivalité i rézime in konba shoviy gonflé in poin sé tou !