Mi koné pa si zot i rapèl lo tan demoun-sak nana in l’élvaz koshon- té i sharoye l’o sal dann fèr-blan pou nouri z’animo . Lé vré, koméla,nana z’aliman é i pèrd pa tro lo tan pou armas lo sal. Mé lo provèrb nou la marké, kèl sé son mésaz ? Si ni kalkil bien, lo sal sé lo réstan d’lo réstan : sé kan la fine manzé, sé kan la fine tir lo réstan pou lo shien, lo shat si ou nana, i rins lo marmite é sé so lo la k’i apèl lo sal. Ou i diré sé in n’afèr k’i ansèrv i arien.Ou i diré sa lé zis bon pou zété .Mé oila , si ou i done sa koshon,li boir-manz sa vèy pa koman .Donk mèm in kékshoz i ansèrv pi nou, i pé ansèrv po nou kansréti pou gingn la vyann sansa la grès.In sans pli zénéral ? I pé trète bann déshé pou fé z’afèr itil.Sa lé a la mod sa koméla.Mi koné pa kosa zot i anpans, mé moin mi pans konm sa.