Akoz mi arparl de sa zordi ankor ? Pars tout kozman kréol nana plizyèr manyèr pou konprann sa. Dizon in manyèr sèryé épi in manyèr amenn lé shoz an plézantri. Myé ksa an kasèr lé kui... 

In ga, mèm in frèr la ékri amoin. Ala kosa li la di : « Moin na dan lidé, bann zansien té i kalkul in ot zafèr kan zot té i di sa. Pou moin demoun té i anserv se kozman-la kan navé in ralé-poussé : Kan demoun té i di aou tout sort mové zafèr dsu out Kont, kan té i kritik aou, ou té i di : ’Kontinié konmsa-minm, na pa assé, mète ankor ! Sa i fé dsu moin konm delo dsu fèy sonj : lo sal i angrèss koshon !’.. .

Astèr, pou pa gingn tro la ont mi apèl o sékour diksyonèr Alain Armand. Mi rod lo mo « l’o sal » épi mi lir : « L’o sal i angrès koshon : sa i vé dir nana bon z’afèr dann tout shoz ! ». Konm zot i oi, sa i arzoinn in pé sak moin la ékrir yèr é sa i vé di osi nout lang lé rish. Donk alon bate la min pou li ! Bravo pouli !