Dopi dé-troi zour la pli i vèrs vèy pa koman : i tonm pa pou zoué ! i tonm pa pou fé sanblan ! I tonm pou vréman. La pli sé in bon konm in mové z’afèr pars mèm pou plantasyon dé foi li fé pous bann plantasyon, dé foi li tyé. Koman ? I sifi bien rogardé, bien ékouté, pou oir koman sa i éspas.

Tout suit-la, mi sort antann in famiy l’apré s’plinn li na poin d’lo dann robiné épi li lé bien annuiyé pou la toilète son bann z’anfan. Lé drol, zot i trouv pa ? Pars bann marmaye lontan lété bien kontan kan la pli té i tonm pars l’avé pa bézoin fé korvé d’lo-té i sifi mète bann résipyan a anparé. In pé téi mète bann bak pou anparé é sa téi ansèrv azot bien kan la pli té fini.

Pou kosa mi di sa ? Pars la pli, konm zot i koné i tonm pa toultan é kan li tonm pi ébin ou lé bien an-nuiyé kan na poin lo dann robiné. Mé si ni kalkil bien, delo la pli sa i pé ète ramasé é i pé ansèrv kék tan. Sa lé vré pou l’moun nana kaz a tèr, lé vré pou l’imèb, lé vré galman pou bann koléktivité. Akoz isi, ramas la pli la pa in priorité, akoz sa i mark pa dann pèrmi d’konstruir. Mi koné la-ba, dan La Frans, dann in péi i apèl Sarant, l’apré fé in rézo pou distribyé lo d’pli.

Ala in bone idé pou nou osi La Rényon. Konm di lo kont lo sé d l’or pou l’moun, mé si ou i ramas pa sé pi l’or, sé l’ordir k’i fo zété.