Mi pans zot la fine antann parl in fanm i apèl Audrey Pulvar ? Sa in madam déor. El i travay in bonpé dann télé épi dan bann radyo konm France-Inter. Sé èl k’i travay avèk in ga i apèl Ruquier dan l’émisyon : "Nou la pankor dormi !". Dsi France-Inter, èl i travay in-èr d’tan tou lé matin. Akoz mi anparl azot fanm-la ?
Pars la télé avèk la radyo la di aèl konmsa : "Done de l’èr ! alé oir in n’ot koté si z’èrb lé pli vèr !". Pars son bononm lé minis dann gouvèrnman sosyalis, donk banna la pèr èl i fé la propagann pou parti-la. In bon rézon ? In mové rézon ? Touléka, mi pans pa sa in fote pou l’kode travay. Mi pans pa non pli sa in fote pou lo kode déontolozi bann zournalis. Moin, mi pans konm sa, mé bann koko fromaz i komann la télé épi la radyo, pou zot par, i pans la sityasion lé riské. I paré lo zournalis i doi z’ète obzéktif, di la vérité san pran parti. Sof si ou i travay dann in zournal d’opinyon. Pars dann in zournal d’opinyon, ou i di out l’opinyon, in poin sé tou, é pèrsone na poin pou arprosh aou kékshoz.
Mé isi La Rényon, nou la konète épi ni koné ankor bann zournalis la télé lé pa si obzéktif ké sa. Dann dèrnyé kanpagn z’éléksyon dépité, nou la vi ankor in n’afèr konmsa. Biensir, lé vré, zot mari, sinonsa zot madam, sinonsa zot kas-krout lé pa minis. Pétète sa i done azot in bak dan l’obzéktivité.
Moin na in dalon la di amoin konmsa : li konpran pa kosa mi sar rod midi kan lé katorz èr, pars toulmoun i koné bien, ète obzéktif isi La Rényon, sé kan ou lé kont Parti kominis. Lé sinp, non ?

Justin