Samdi dèrnyé dann in vil La Frans i apèl Carcassonne, bann partizan la lang d’oc la manifèst in kou, par raport solon zot l’Etat i roul azot kari sou d’ri. Li réspèk pa son parol. Li réspèk pa non pli la sharte bann lang l’Érop... vi k’ nana z’afèr lé obligatoir fé, é li fé pa... vi k’nana z’afèr i fo pa fé é li kontinyé fèr ziska zordi.
Banna i domann l’« occitana a l’escola »... - mète la lang d’oc dann lékol -. Pou fèr in n’afèr konmsa lé byin nésésèr donn in formasyon bann z’amontrèr, rouv lékol an plis. Arzoute èk sa, fé in jèss pou lo matéryèl pédagozik... La pa aryink sa, pars dann la kiltir nana é nana z’afèr pou fèr... Inn an parmi mon bann dalon la parti Montpellier. La-ba, li la vi plin gayar z’afèr mé li di amoin konmsa, li la pa vi bann tik-tak i amontr k’i fé in konte pou vréman avèk promyé lang péi-la, avèk son promyé kiltir...
Tansyon ! Li di pa k’i fé pa, mé li la di, an tan k’moun étranj, li la pa vi. Pètète, lé tro dann fénoir, é lé pa assé dan la limyèr ! Poitan, d’apré sak demoun la di amoin lang-la, kiltir-la, la vi banna, lé byin valab pou vréman ! Vin mil pèrsone la déside fé antann z’ot voi. Siouplé ! Sa i konte sa ! I fo gouvèrnman i tyinbo konte de sa ! I fo pa li pran sa konm in zéro, la gosh in shif !

Justin

Lésplikasyon inn-dé pti mo :

roul kari sou d’ri : kan i fé pa lé shoz konm k’i fo.
moun étranj : in l’étranzé.
promyé lang, promyé kiltir : té la avan fransé i ariv.
fénoir : la nuite.
féklèr : la zourné
in zéro la gosh in shif : na poin la valèr par li-mèm.