Rozman pars si l’été sa, l’onèkté noré té in marshandiz k’i vann épi k’i ashète é rozman la pa lo ka. Dabor, l’onèkté, sé koi ? Sé pa lo mèm z’afèr ké dann la lang fransé. Dann pur kréol sé la politès ! Ala in garson bien onète : sa i vé dir in garson bien élvé. Si sa sé in marshandiz ébin sa na poinn pri ! Sé konm k’i diré in trézor... Astèr si i di sa i ashté pa dann gran sirfas, sa i vé dir osi la pa l’androi pou bien aprann l’onèkté, la politès. Bin ousa i aprann sa ? Ousa i ashté in bien présyé konmsa ? Na poin d’ot solisyon ké lo anparmi l’moun, dann out famiy par proférans, avèk bann z’ami, avèk demoun ou yèm é i yèm aou. Pou kosa ? Pars l’onèkté épi l’amour, boudikont, sa lé in pé famiy. Noré galman l’ékol mèm si l’ékol, souvan dé foi i agard son portré dann la glas la sosyété é par plas lé bien par plas i lès a déziré. Alé ! Mi arète la, é mi di azot : nou va artrouvé, pli d’van, sipétadyé.