In drol kozman déssi bann zémigré !
In madam i parl déssi bann zémigré. El i rakont, inn an parmi son famiy lé médsin dann sid la Frans. Bonom-la, d’apré sak èl i prétan, i rakont aèl konm de koi bann zétranzé i vyin konsilté dann in bann gayar-gayar loto épi, byin antandi, i pèy pa médsin, i pèy pa non pli médikaman.

Sanm pou moin, lé vré ossi pou nou !
Mé lo fanm la pankor fini son kozman. So kou issi, ala k’èl i anparl bann moun La Rényon épi La Martinik. Solon èl, nou lé parèy. Ni roul dann bann voitir "ritilan" é ni pèy pa médsin. Nou lé assisté dépi an-o ziska an-ba. Lé drol, madam-la té i koné lo mo "assisté". I fo kroir lo vokabilèr réaksyonèr La Rényon l’apré koloniz banna la-ba.

Koué k’i pé di d’sa ? Bokou d’shoz. Mé pou zordi, mi rotyin solman la konsidérasyon bann rish la-ba nana pou nou issi. Mi pans, malérèzman, si i ékoute in pé issi-ossi, sar pa tro diféran sak banna i di la-ba. Sé l’opignon bann rish déssi bann ti kolon.

Justin