Kann ? Nana in kantité varyété isi dan nout péi. Koméla, zot i port in niméro avèk in lèt zis dovan lo shif. Sak i sort Hawaï, i port H ; sak i sort Moris i port M, sak i sort La Rényon i port R... Koméla, lé konm sa ! Mé dann tan lontan, l’avé tout sort gayar nom. Té i apèl kann roz, kann koir, kann moris, kann bonbon, kann tamarin, kann mapou, kann gingan. L’avé mèm inn té i apèl kann ra gro pans. Rogard in kou dann liv l’istoir La Rényon, moin lé sir zot va domandé si sé bien kann zot i oi si la foto !

Solman, ni koné bann plantèr lé bien trakasé koméla. Pou kosa ? Pars dann pri zot i vann zot kann, nana la moityé sé lo pri épi la moityé sé l’èd sosyal. In pé va di kann lé péyé par dsi lo pri. Donk, i fo siprime lo kota, épi si plant pi in sèl pyé kann, la pa lo traka bann kapitalis. Lé vré, la Frans la di èl va kontinyé soutien lo pri pou La Rényon. Kroi touzour, mé fyé pa tro ! Pars gouvèrnman la Frans, kisoi la droit, kisoi la gosh, i donn souvan dé foi satisfaksyon bann lobi, é si domin i mank lo bidzé pou zoinn lé dé bout par l’milyé, mi koné pa ozis sak zot lé riskab fé... Sof, sof si kèkpar, zot la pèr i ariv in nui dé gran kouto, mé i vo myé pa anparl malèr. Arzout èk sa, nou la fine vann anou kor-é-bien avèk Téréos, é Téréos i koné pa lo patriyotis rényoné li. Li s’anfoutsa.

Solman, kann la pa arienk do sik. Kann sé la bagas, sé la mélas, sé la vinas, é avèk sa, plis lo sik i pé fé tout z’afèr. Si zot la lir dan nout zournal, zot la vi i pé fé l’ésans pou mèt dan loto, lo kar, lo kamion, ziska dan l’aviyon. I pé ansèrv l’ékime épi la sann konm l’angré, i pé fé plastik bio, i pé fé produi pou bann krèm boté, pou manzé demoun épi z’animo. Ni pé baz la-dsi pou dévlop nout l’indistri shimik. I pé mèm plant kann pou fé l’éstrésité. Nout l’or vèr an vérité, provik i sasine pa li avan son tan.

NB : An atandan, dopi lo trant é in zilyèt ziska lo kat moi d’out, nout l’or vèr i éspoz dann Por. Pran lo tan, alé voir !

Justin