Oté

L’ot koté shomin ou i trouv travaye an kantité, kaziman sou galé

Justin / 20 séptanm 2018

JPEG - 43.6 ko

Matant Zélida la ékrir Justin :
Mon shèr nové, mon spès salté, rouj-de-fon dovan l’étèrnité in foi an plis ni oi bien désèrti moun i travaye pa pars zot la poin l’anvi travaye é pa pars la poin travaye. La prèv ? Mésyé lo prézidan la répiblik i sort di sa dann in diskisyon avèk in marmaye l’avé pass in diplôme ortikiltèr. Kan li la ésplènn avèk lo prézidan pars li téi trouv pa travaye dann son formasyon, lo prézidan la réponn ali konmsa travèrs la ri épi alé dann bann bar, li va gingn travaye sa lé sir. Bann zournalis fourné konm lé pa posib la parti dann bann bar épi la domann si i rode demoun pou travaye bann patron la réponn ali oui é si zot i rofiz bann kandida sé pars lé pa bien formé dann métyé sansa l’èr pou rokrité lété a ankor arivé. Alor kan mi di in n’afèr sé in n’afèr i tienbo d’bout. Tok ! Pran sa pou toi !

Justin la fé pou répons :
Mon vyé matant k’i koz toultan la boush rouvèr m’a dir aou franshman ou i koup amoin la. Pou kosa mi di sa ? Pars si ou l’aprann in métyé ou i yèm la pa pou fé in métyé ou i yèm pa : in l’ortikiltèr la pa pou alé lav la vésèl dann bar. Sansa li nora aprann travaye dann bar in poin sé tou. Lé vré toulmoun i pé fé tout zafèr mé i pé mal fèr osi, sirtou si ou l apoin la formasyon épi la pratik pou fé métyé-la.
Arzout ék sa bann zournalis lé vré zot la parti rann azot kont par zot mèm é zot la vi lo prézidan l’avé di la vérité. Sof ké zot la fé débisk azot kan zot la rant dann bar : in pé pars zot téi done pa l’inprésyon rodé pou vréman travaye dann bar, sansa pars zot téi koz avèk demoun an kaméra kashé, soi pars z’ot nivo zénéral lété pa sète in sèrvèr dann bar.
Alor matant out bann fab dsi lo shomèr i vé pa travaye ou valé domann Roland Garros, moin lé sir li va tir son min dann posh pou done in pé travaye é bann moun i koz la boush rouvèr in tapin dan la tète. Alé ! Pran sa pou ou !