Matant Zélida la ékrir Justin :

Mon shèr nové, mon spèss salté, rouj-de-fon dovan l’étèrnité in foi an plis ni oi bien déssèrtin moune i travaye pa pars zot la poin l’anvi travaye é pa pars la poin travaye. La prèv ? Méssyé lo prézidan la répiblik i sorte di sa dann in diskissyon avèk in marmaye l’avé pass in diplôme ortikiltèr… Kan li la ésplènn avèk lo prézidan pars li téi trouv pa travaye, lo prézidan la réponn ali konmsa travèrs la ri épi alé dann bar, ou va gingn travaye. I manke pa bande zanploi inokipé pars de moune i vé pa travaye. Tok ! Pran sa pou toi !

Justin la fé pou répons :

Mon vyé matante k’i koze toultan la boush rouvèr m’a dir aou franshman la wi koup amoin la. Pou kossa mi di sa ? Pars si ou l’aprann in métyé wi yèm la pa pou fé in métyé wi yèm pa : in l’ortikiltèr la pa pou alé lave la véssèl dann bar. Sansa li nora aprann travaye dann bar in poin sé tou. Lé vré toulmoune i pé fé tout zafèr mé i pé mal fèr ossi, sirtou si ou la poin la formassyon épi la pratik pou fé métyé-la.

Arzout ék sa bann zournalis kan zot la parti vérifyé si sak Prézidan la di lété vré, zot la rande azot konte lété opa si sinp ké sa sirtou kan dann bar épi dann résto néna in klik demoune i travaye o blak. Lantouléka bande zoinalist la fé sanblan zot i sava rode travaye é biensir vitman-vitman la débisk azot… in pé pars zot téi done pa l’inpréssyon rodé pou trouvé, sansa pars zot téi koz avèk demoun an kaméra kashé, sansa ankor pars z’ot nivo zénéral lété pa sète in sèrvèr dann bar.

Alor matant out bande fab dsi lo shomèr i vé pa travaye ou valé domann Roland Garros si sa lé vré, mwin lé sir li va tir son min dann posh pou done travaye demoune é si ou lé pa kontan ouva pran konstan. Tok ! Pran sa pou ou.