Matant Zélida la ékrir Justin :

Mo shèr nové, mon spès salté, rouj-de-fon dovan léternité,

kosa zot la pa di lotrozour kan la réjyon la désid arèt donn larzan l’ARER ? La di sé in rotour an aryèr ! La di ankor sé la fin lénèrzi dirab ! La di si tan tèlman zafèr... Mé zordi, tout sak la di, lé pa vré an finn kont. Pou kosa ? Lé vré l’ARER i égzis pi, mé la fé in SPL énergie Réunion pou ranplas ali. Pou arzout èk sa, lo nouvo sosyété va okip lénèrzi ronouvlab, é va fé in program pou déboush in zour dsi lotonomi dann lénèrji. Konm de koi, lé pa nésésèr fé la bou avan la plui. Tok ! Pran sa pou toi !

Justin la fé pou répons :

Mon vyé matant k’i koz touzour la boush rouvèr,

Nouvo sosyété na mèm bi ké l’ARER, bin alors, pou kosa i siprime ali ? Pars sé Paul Vergès la désid fé l’ARER, l’ané 2000 kan in pé partou lété pankor donn vréman in bon dépar pou lénèrji dirab ? Akoz ankor ? Pars sé dann tan Paul Vergès la invant lidé d’lotonomi dann lénèrji... Dann tan-la, téi rèv mèm pa anbèk dann in shomin konmsa.

Pars d’apré zot l’ARER la pa fé arien ? Plis san mil shofo solèr sa sé arien alor ? Bann santral éléktrik solèr sa sé arien osi ! Bann santral éléktrik par lo van, sa sé la po d’patat pétèt ? Lékspérimantasyon dann lénèrji la mèr, dann la jéotèrmi, dan la byomas, sa i kont pa ? Arzout ankor lo prozé mète in takon pano solèr dsi la rout tamarin, sa sé zéro la gosh in shif sa ?

Solman na in shanjman pou vréman. Lakèl d’apré ou ? Dann tan l’ARER, bann konséyé réjyonal té pa péyé pou zot prézans, avèk la SPL, Didier Robert prézidan va gingn ankor inn bone som, shak konséyé réjyonal sra dann lo konsèy va gingn in bon moné é o réstan, mi anparl mèm pa...

Bin lotonomi dann lénèrzi ? Li lé ranvoyé dann tan kalann grèk. Dizon kan kok nora lo dan !

Justin