Lané 1779, dann kartyé Sintandré, bann blan la antann konm in mové son : bann zésklav lavé désid profit la fèt la pannkot pou mat in plan pou tyé bann blan épi bril le légliz.
L’arèt bann moun lavé pran la tèt, la mèt in pé la jol pou pèrpèt, la kondane déssertin a mor avèk tout bann tortir téi sava ansanm.
An parmi lavé in zésklav té i apèl Bernard. Kan li la aprann kossa lavé fé son bann kamarad, li la pèrd kouraj épi li la mèt la kord. Bann jolyé la trouv ali mor dan la jol.
Donkalor, tribinal la désid fé in légzanp pli for ankor k’pou lé z’ot. Artyé lo kor l’boug.
Inn la demann rapel : la arfé lë prosé. An atandan la antèr lo kor. La arkomans lë prosé : tribinal rapèl la désid parèy. Pou li in n’afèr konmsa té fézab.
Donkalor, lë 2, moi d’out 1779 - lë moun té mor dëpï tro-kat moi - la détèr lë kor, la anmar ali, vant an ba, sï in lamayaj bransh, la fé trinn ali dann tout rï Sintandré déyèr in sheval. La pann ali tèt an ba pandan vinn-kat èr. Aprésa, la jèt lë kor la voiri.

Justin