Ala in zistoir mi pans de tou tan é sak lé blijé fé zafèr avèk la bank, moin lé sir zot i pans konm moin. Si zot la bien lir amoin zot la romark moin di : « blijé fé zafèr avèk la bank » konm k’i diré in kékshoz ou i fé par obligasyon é pa par plézir. Par obligasyon pars dizon zot néna lo monopol larzan é si ou néna dé zafèr pou fèr, sansa kékshoz pou ashté, ou lé forsé kongn dsi la port la bank. Na poin lontan moin té i vé ashté in kok loto pars la myène i va pi-i fo rékonète. Lo bankyé, in marmaye ou i apiye dsi son né, i pé sort dolé la gard amoin bien an fas épi la afi : « kosa nou néna pou gingn avèk ou ? Arien é si ou i pète loto kisa va ranbours lo bank. Oté, jirman té fine ariv la port mon baro la boush pou sorti mé moin la tienbo mon lang. Mé zami, la bank i vé larzan san risk é tanpir pou nou si ni romète nout déstin rant zot min. Alé ! Mi kite azot rofléshi la dsi é ni artrouv pli d’van. Sipétadyé !